Ələsgər Əlioğlu : - OĞLANLAR ƏSGƏR GEDİRLƏR
Qarmon ciyərinə çəkir havanı,
Köksündən "Heyratı" axıb tökülür.
Gedənlər kimlərdir,
İndi gəl tanı,
Hamı da şənlənir, sevinir, gülür...
Həsrətlər doğacaq
Qatarın hayı
Axıb qulaqlara dolduğu anda.
Analar yanılıb bir müddət payı
Artıq çəkəcəklər süfrə başında.
Ələk-vələk edib talvarı, damı,
Nənələr səbətə sovqat düzəcək.
Utancaq kölgələr payız axşamı
Tənha dolanacaq, tənha gəzəcək...
Oğlanar gedirlər,
Qurşağa dönüb,
Sərhədlər boyunca dolanacaqlar.
Qızlar gizli-gizli onları anıb,
Axşam ulduzlara boylanacaqlar...
1972