Qar tutub dərənin qapılarını ,

Keçmir qapısından içəri bahar .

Durna tək yurduna qayıdıb , gəlib ,

Sevgisi al ,yaşıl - köçəri bahar .

Yaşıldır , ibadət bayrağımız tək ,

Baharın üzündə Tanrı nuru var .

Əlləri bir ömür göydən asılar ,

Allaha duaçı olan ağaclar .

Arxın kənarında bir xanım söyüd ,

Sulara danışar öz yuxusunu .

Qəhərdən boğazı tutulub arxın ,

Hələ soyunmayıb buz çuxasını .

Yuxuma gəlməyən anam kimidir -

Bəxtim hər baharda açmaz ki , çiçək .

Ağaclara nəzər dəyməsin , deyə ,

Tumurcuq asıblar - gözmuncuğu tək .

Payız xəzəlinin ocağı sönüb ,

Ocaq yeri kimi səbrim qaralır .

Analı günlərim təzə cığır tək

Yazda ot , qışda qar altında qalır .

21 . 04 . 2026