Damardakı qan kimi

donub divar saatı...

Allahın qoluna taxılmış

saat indi neçəni göstərir?

İndi neçənci ildi

Qarabağda?

Ayın neçəsidi

anası ölmüş

şəhidimizin baş daşında?

Təqvimin qara-qırmızı günləri

Ali qanunların vərəqləri kimi

tökülüb ayların içindən

pula gedir gül kimi.

Üç gün sonranın gülü

tapdanır zibil kimi.

...Bir yadigar döş nişanını

əzizlər,

əzizlər şəhid anası.

Bilmir harda gizlətsin

göz yaşlarını.

Ancaq gizlər

şəhid anası:

"Çörəyi suya batırıb

böyüyən oğul,

torpağı qanına batırdılar"...

...Qan ətrini duyan varmı

bu yazın yağışlarından?!

Deyəsən, heç Allah da

gözünü yayındıra bilmir

Şəhid balasının baxışlarından!..