Heç nə dəyişməyib, indiki kimi köhnə xanəndələrin də vaxtında oynaq xarakterli adamlar var idi, necə deyərlər, özünü ağır aparanları da. Onlardan biri də rəhmətlik, xalq artisti İslam Rzayev olub…

İslam Rzayev 11 noyabr 1934-cü ildə Füzuli rayonunun Sərdarlı kəndində dünyaya gəlmişdi. Qarabağ xanəndəlik məktəbinin layiqli davamçılarından biri kimi, onun səsini ilk dəyərləndirən Seyid Şuşinski olub. Peşəkar musiqi təhsilini Bakıda Asəf Zeynallı adına Azərbaycan Dövlət Musiqi Texnikumunda alaraq, Seyid Şuşinskinin sinfində muğam dəstgahlarını mükəmməl öyrənmişdi. Həmçinin Zülfü Adıgözəlovdan və Həqiqət Rzayevadan muğam dərsləri almış və sənətini təkmilləşdirmişdi. Xanəndə daha sonra Azərbaycan Dövlət İncəsənət İnstitutunu bitirmişdi.

1958-ci ildən ömrünün sonunadək Azərbaycan Dövlət Akademik Filarmoniyasının solisti kimi fəaliyyət göstərib...

Onun oxuduğu "Çahargah", "Bayatı-Kürd", "Mahur–Hindi", "Rast" muğam dəstgahları AzTV-nin fonduna daxil edilib…

Yaşasaydı noyabrın 11-də 90 yaşı tamam olacaqdı. Ruhu şad olsun!