Dağda bir çobana göz eyləyəsən-

Çobanın qoynundan bir tütək çıxa.

Göyün ətəyindən elə tutasan

Nə əlin üzülə, nə ətək çıxa.

Bu bəxt yola getmir niyə ağ ilə?

O bərki sındırram bu yumşaq ilə..

Qaçıb oynayasan bir uşaq ilə

Yoluna hardansa çərpələng çıxa.

Güneyin əriyən qarı kimiyəm...

Payızın çatlayan narı kimiyəm.

Qəm- çiçək, mən də ki arı kimiyəm-

Bir azdan bu eşqdən bir pətək çıxar.

Elə sirr qalırsan nə sirsənsə sən.

Dərdin də pas atmaz əsilsənsə sən.

İşıqdan yapışıb gəzirsənsə sən,

Qorxma- qabağına lap fələk çıxa.

Eşq də şərab kimi çıxar başına,

O kimdi qələmi sıxar başına?

...Gecə ulduzları yığar başına-

Ay da ürək etməz çölə tək çıxa...