Ələddin Əzimli - OLMAYIR
Ədəbiyyat
12:55 / 08.01.2026
Baxış sayı: 1074
"Sözlərdəki sən"dən
***
Bir gör haçankı gecədir,
Səhəri açmaq olmayır.
Dərd ki səni ram elədi,
Əlindən qaçmaq olmayır.
***
Bu nə təlaş, nə oyundu,
Bəlkə də axırdı, sondu.
Kim özünə arxayındı,
Yanından keçmək olmayır.
***
Gəl tab elə bu əzaba,
Dolaş el-el, oba-oba.
Bir də gördün söndü soban,
Evə nur saçmaq olmayır.
***
Əldən vermə dayağını,
Yerə bərk bas ayağını.
Göylər açıb qucağını,
Heyf ki uçmaq olmayır...
