Şəhidlər xiyabanı –

şəhidlərin şəhəri

bəzəyi bayraqlar,

çiçəklər.

Məzarlara gömülmüş burda,

bu məkanda

neçə-neçə qatı açılmamış muradlar,

diləklər.

Sükutu deşir,

ürəyi param-parça edir

eyni boyda,

eyni biçimdə sakinlər.

Simalarında qürur, əzəmət,

cəsurluq, özgüvən, sevinc.

Şəkil çəkdirəndə

bilirmişlər sanki

məğrurluq salnaməsi

olacaq bu şəkil,

həm qürur duyacaq,

həm üzüləcək ziyarətə gələnlər,

ürəkləriylə yamayacaq

yarılan bağırlarına bu şəkli,

udacaqlar göz yaşlarında boğulan qəhəri.

Şəhidlər xiyabanı-

şəhidlərin şəhəri.