ÇƏKİCLƏ BAŞ YARMIŞDIM Kİ!?

Çayçı Ələkbər münaqişə zəminində çəkiclə vurub həmkəndlisinin başını yarır. İş məhkəməyə düşəsi olur. Hakim soruşur:

-Vətəndaş, siz çəkiclə bu adamın başını yararkən bilmirdinizmi ki, o ölə bilər?

Bayaqdan ayaq üstə dayanıb hakimi dinləyən Çayçı Ələkbər dillənir:

-Möhtərəm hakim, hardan biləydim?.. Axı birdən-ikiyə çəkiclə baş yarmışdım ki!?

HÖRMƏTİN DƏ ARTAR,

İZZƏTİN DƏ

Oxuyub-çalmağı elə də sərrast bacarmayan bir aşıq özünü Cinli Əliyə yaxın bilib kürrüklənir:

-A qardaş, camaatda da qalmayıb, nə qədər çalıb-oxuyuram, heç hörmət-izzət də göstərmirlər.

Cinli Əli cavabında deyir:

- Sən də nə çal, nə də oxu! Bundan sonra baxıb görərsən, hörmətin də artar, izzətin də!

KİMDİR ONU CƏNNƏTƏ BURAXAN!

Kənd cavanlarından biri Cinli Əliyə sataşmaq istəyir:

-Əli əmi, maşallah, səksən yaşına bir şey qalmayıb. Rəhmətlik dədəmə bir ismarıcım var, gedəndə onu çatdırarsanmı?

Cinli Əli dillənir:

-Yox, ay bala, mən dədənin üzünü hardan görəcəm?

-Niyə görmürsən ki, ay Əli əmi?

-Ay oğul, sənin dədən sağlığında kənddə o qədər pislik eləyib ki, kimdir onu cənnətə buraxan!