Nədir bu, səndən çəkdiyim,

Hər közə yaxılan könlüm?

Hər gün göz yaşı tökdüyüm,

Hər sözə sıxılan könlüm.

Haqq səsi, həqiqət ünü,

Fikirlər yedi ömrünü..

Didilib-tökülən günü

Bölünən-çıxılan könlüm.

Hər nalənə, fəğanına,

Bəxtdən küskün zamanına,

Yanğınına, dumanına

El-aləm yığılan könlüm.

Tanıdın hər təzə qəmi,

Tapmadın mən tək, həmdəmi.

Ay, eşqi də özü kimi,

Daşlara çaxılan könlüm.

Dağılmısan dağım-dağım,

Necə qurum, necə yığım...

Əlli ildə topladığım

Bir anda dağılan könlüm.

Adilə, həyat nağlını

Ucundan keçir ağlının...

Ağlayır hər bir ağrının

Dağından yıxılan könlüm.

2022