ÖMRÜN YÜZ İLİ GEDİB-  yazdı Nazim Əhmədli

Ədəbiyyat 16:24 / 07.12.2025 Baxış sayı: 387

 

Axı, ürək neyləsin,

ürək üzülüb gedib;

həsrətim çox inciyib,

ağzı büzülü gedib;

 

dərd var, ilmə-ilmədi;

sökülüb tökülmədi;

mən saxlaya bilmədim,

ruhum küsülü gedib;

 

qələm çalan kimiydi,

mürəkkəbi kəmiydi;

ömür-gün su kimiydi,

axıb, süzülüb gedib;

 

çoxdu, dərdin qırçını,

yorur yolu, yolçunu;

çiynimdəki xurcunun,

ipi, qəzili gedib;

 

yol gedib yorulmuşam,

gün vurub, qaralmışam;

yatıb harda qalmışam,

ömrün yüz ili gedib.

      07.12. 25