Şakir Xanhüseyn : - "BEŞ BARMAQ" silsiləsi
1.BAŞ BARMAQ
baş barmaq, hər şeyə əlamı demək,
əlalıq nə isə varmı, baş barmaq...
bəxti hər adama yarmı, baş barmaq
mən neçə ürəyi
gördüm daş, barmaq...
bəzən çevrilirsən başı aşağı;
ağrıyır, acıyır canın, püskürür,
nifrətin püskürür, kinin püskürür...
yuxarı qaldırıb bəzən
səni mən
necə söyləyim ki, əla sözünü;
baş barmaq, işinlə önə çıxmalı,
baş olmaq bir az da düşünməklədir...
2.İŞARƏT BARMAĞI
barmağınla göstər görüm
nəyi hədəf seçirsən...
bir addım atsan, elə bil
keçilməzlər keçirsən...
arif üçün bir işarə
bəsdi yolunu tapsın,
eh, daşın daş, qayanın da
qaya dilini tapsın...
bir barmaq işarəsiylə
bəxt də adama dönə...
bütün gecəni yanmağa
barmağım şama dönə...
Tanrım, dərdimə dərmantək
nə çarə gözləyirəm;
səndən son əlac kimi bir
işarə gözləyirəm...
3.ORTA BARMAQ
Salam, ay uzun hacı qardaş,
hər kəsə böyüklüyünlə öyünə bilərsən,
əlbəttə, sevinə bilərsən,
ən ümdəsi, beş qardaşın
ən sevimlisinə çevrilə bilərsən?
yanındakılardan birisi istər özünü
çox darta, barmaq,
ancaq yenə sən boyda olmaz,
ay orta barmaq;
böyüklük özünü çəkməklə deyil,
nə də böyüklər yanında boyun bükməklə deyil,
böyüklük-öz böyüklüyündü,
iş, söz böyüklüyündü!
həmişə belə
təki şənin arta, barmaq,
ay orta barmaq...
4.ADSIZ BARMAQ
sevgi nəfəsi dəyib sənə,
kim adsız deyib sənə?
belinin kəməri çoxunun arzusudu,
sıxması, ağrıtması da...
Mən söyləmərəm ki,
hansı dərddi belə üzüb barmağı,
qoy deyim qəlbimdən keçəni birbaş:
vallah, incitməz heç üzük, barmağı...
Adsız barmaq...
bir hikmət daşıyır bu ad özündə,-
adsızdı sevgilər, məhəbbətlər də...
bir də
yanı-başımızda nə qədər adı
çəkilməyənlər var
nə xeyirə, nə şərə,
imza atsalar da böyük işlərə...
...bükülmə ümidsiz-ümidsiz, barmaq,
ən adlı barmaqsan, ay adsız barmaq...
5.ÇEÇƏLƏ BARMAQ
beş qardaşın ən kiçiyi,
ərköyünü, nazlısı,
bəlkə də ən şirini- duzlusu
çeçələ barmaq...
əgər itirmisənsə yolunu,
sağını, solunu,
gəl mənim ovcumda gecələ, barmaq,
çeçələ barmaq...
böyük qardaşların yedi
sənə nə qaldı,
başındakı nə qeylü-qaldı...
bir şeir verim onu oxu-
höccələ, barmaq,
çeçələ barmaq...
ha qaçırsan,
qismətin olana da çatmaq olmur,
yetmək olmur,
yenə vida etmək olmur
hər ötüb-keçənə, barmaq,
çeçələ barmaq,
çeçələ barmaq...
...böyük qardaşların yedi
sənə nə qaldı,
culu, culu...
20.06.2022