Hüseyn Arif - YAĞIŞ YAĞIR, SEVGİLİM

Ədəbiyyat 10:25 / 10.12.2025 Baxış sayı: 472

 

İslanır səhər-səhər

Qızılgülün yarpağı,

Mən sevirəm yağışlara

Pəncərədən baxmağı...

Damcıların xoş səsi,

Xatırladır yaylağı.

Körpə quşlar boylanır

Yuvasından arabir,

Təzə qalxan göy otlar

Su içində gizlənir.

Seyr etdikcə bunları,

Gör, sevinir qəlbimiz...

Yağış yağır, sevgilim,

Sular axır, sevgilim,

Varmı bir xəbərin?

Yarpaqlar gəlin kimi

Sırğa taxır, sevgilim,

Varmı bir xəbərin?...