Hey, gedən yolçu,

gecələrə məndən salam söylə.

De ki,

mən həmin O

eşq dəlisi olan qadınam!

Qorxma,

bütün dəlilərin gözləri böyümüş,

saçları pırtlaşıq olmur...

Sən Leyli ilə Məcnunu tanımışsın təkcə,

mən Allahdan gizlin doğulan,

atəşlə küldən yoğrulan eşq qadınıyam.

Hey, gedən yolçu,

gecələrə söylə,

mən dərdlərindən kərpic-kərpic

Bəzz qalası hörən qadınam.

Ömrü şama bənzəyən,

gilə-gilə əriyən,

kiminə işıq,

kiminə istilik verən qadınam.

Azadlığı üçün odda yanan,

övlad üçün günaha batan qadın...

Mən həmin o qadınam,

eşq dəlisi...