Əbülfət Mədətoğlu : - Ürəyimə

Ədəbiyyat 09:04 / 01.11.2024 Baxış sayı: 2948

 

Qapımı döyüb, keçdin

Soyuq və yad bir əllə...

Bilmədim , nəyi seçdin

Ödədiyin kirənlə -

ürəyimə?..

 

Gözümdə şimşək çaxdı,

Ruhum isə üşəndi...

İçimdən ağrı axdı

Zəli kimi döşəndi -

ürəyimə!..

 

Toxunduğun tətiyin,

Mərmisi od qaladı...

Ömrün , bax bu, gədiyin

Atəş təzdən caladı -

ürəyimə...

 

Nəyin cəzası oldu,

Bu soyuqluq və yadlıq...

Unutdunmu ki, doldu

Sevgi ancaq bir adlıq -

ÜRƏYİMƏ!..

 

...İllərimin hər anı

Sən yaşadan qərinə...

Köçür, sən öz dünyanı,

Dünyaların yerinə-

ÜRƏYİMƏ!..