Xatirə Fərəcli : -HƏYAT SEVGİSİ DƏ BOŞ

Ədəbiyyat 16:47 / 04.04.2025 Baxış sayı: 7261

 

Alışdıq ölümə də,

Adiləşdi hər gediş.

Yansın belə alışmaq,

Od tutsun belə gərdiş.

Eşqlər, vədlər quru söz,

Münasibətlər naxoş,

Bütün sevgilər kimi,

Həyat sevgisi də boş.

Həyat elə özü də

Sevinc donlu möhnətdir,

Ömür deyilən nəsnə

Bapbalaca möhlətdir.

Çarəsizcə çarpışıb

Dilək qoyub gedirik,

Tərk edilib, tərk edib

Ürək qoyub gedirik.