Yurdda düşüncələr - Rafail Inceyurd

Ədəbiyyat 08:50 / 08.04.2025 Baxış sayı: 1259

 

Bax, bu yerdə, bax, bu dəm

Özümdəyəm, özüməm.

Səsinə bax sükutun,

Çiçəkləyir zümzüməm.

 

Yenə zamansızlaşır

Gürş alan xatirələr.

İtilənib gəldilər

Korşalan xatirələr.

 

Bura gedər-gəlməzim,

Bura aldığım nəfəs.

Bura can verən kədər,

Bura dirilən həvəs.

 

Peşiman ayrılığın

Körpüsü var qabaqda.

Bir yaxşısı “keç” deyir,

Bir pisi var qabaqda.

 

...Qoyma bəd danışmağa,

Yaz ağzı, yum ağzımı.

Çoxum çoxdan gedibdi,

Özümə ver azımı!..

02.04.25