Qəlbimdən bir arzu keçdi,

Göz önümdən bir xəyal.

Sahildə gəzişirdik ikimiz,

Tapışmışdı ruh ekizimiz.

Burada birləşmişdik

Təkliyi paylaşan

İki gileyli, iki talesiz.

Zaman dayansın istədim

Sahildə lövbər salan gəmi kimi.

Sakit, hamıdan xəbərsiz.

Ya heç olmayaydıq biz -

Nə sən, nə mən, nə dəniz.

Ya da ayrılmayaydıq

Bir sən, bir mən, bir dəniz...

Diqqətlə bax dənizə, sonra gözlərimə.

Gözlərim də bir dəniz.

Bax ki, gözlərim səni gözlərinə əksin,

Dəniz kimi dərinliklərə çəksin.

Anlatsın sənə həyatın var olduğunu,

Sevginin sonsuzluğunu.

Görəcəksən gözlərimdən

Qəlbimə gedən uzun bir yololduğunu.

Orda görsən bir sızıltı, bir yara

Ört üstünü üşüməsin,

Heç toxunma, inciməsin.

Bütün dərdlərdən uzaq,

Bu dənizdə itək, bataq.

Yanımızda balıqlar üzsün

Xallı, qızılı, bəm-bəyaz.

Pulcuqları rəngarəng

Elə bil bahar, yaz.

Mənə çiçək əvəzinə bağışla

Bir lilpar, bir yosun.

Süfrəmizi bəzəyən

Dəniz qızları olsun.

Otağımız dəniz,

Badəmiz eşqlə dolsun.