Hamıdan çıxıb gedəsən,

Gedəsən çox uzaqlara.

Yer üzünü tapşırasan

O balaca uşaqlara...

Götürəsən qələmini,

Son şeirinin varağından.

Hərdən əyilib öpəsən

Çiçəklərin yanağından.

Bir qız çıxa yolun üstə,

O ağlaya, yol ağlaya.

Gedəsən itən günəşi

Soraqlaya-soraqlaya...

Axşam aya qol açasan,

Qaranlığın inadına.

Yorulanda baş qoyasan

Bir göyərçin qanadına...

Tənhaların yığıldığı,

İzdihama yeriyəsən.

Gözlərindən ay işığı

Dama-dama yeriyəsən...

Dalğaları çevirəsən,

O üzünə, bu üzünə.

Bat, ya batma, nə fərqi var-

Hamı çıxır su üzünə...

...Qoy arxanca danışsınlar:-

Hara getdi, nəyə getdi?

Bir uşaq göyü göstərə-

Allahı görməyə getdi...