("Böyüklər üçün uşaq şeirləri" silsiləsindən)

Qarnın belindən keçir,

Oğlaq, ay oğlaq...

Aclıqdan mələyirsən,

Duyan ürəklərə dağ çəkirsən, dağ !..

Gündə bir öynə dadar-dadmaz

Əmməklə,

Çətin ətə-qana dolarsan.

Gözün

Ananın döşünə tamarzı

qala-qala,

Özün də süddən yanıq qalarsan...

Başa torba tikərlər,

Ancaq torba-döşlük tikiblər,

Sənin ananın döşünə...

Qismətinə də sərhəd çəkiblər,

Bir bax bu dünyanın işinə...

Sənə çox görüblər

Ananın döşünü...

Şərik çıxıblar,

Sən əmməli südə...

Dərdini kimə deyəsən,

Hansı meydanda,

Hansı kürsüdə?..

Qarnını doyurmaq istəyirsənsə,

Fikrini sürümə

Arana, dağa...

Canını dişinə tut,-

Əlac qalıb zor-xoş otuxmağa...

22.12.2024