QARA BULAQ

Qarışqalar yaza çıxıb,

Yuvalar

Daha oyaqdır.

Qarışqalar üzə çıxıb,

Yuvalar

Qara bulaqdır.

YAZ BULUDLARI

Göydəki yaz buludları,

Nəhəng-nəhəng ağ çiçəkdir.

Yer onları çox xoşlayır,

Bircə-bircə dərəcəkdir!..

GİZLƏNQAÇ

Yaz çağı

Quzeyə

Sinər qar.

Günəşlə

Gizlənqaç

Oynayar...

QARANQUŞ

Obadan köçürdü qış,

Qayıdırdı qaranquş.

Yolda

Qaranquşla qış,

Birdən qarşılaşdılar.

Qollarını çırmayıb,

Möhkəmcə tutaşdılar.

Qaranquş

Qalib çıxdı

Bu gün yaz döyüşündə.

Ancaq qışın qarından

Qaldı onun döşündə...

AĞACA DIRMAŞDIRIB...

Qartək ağ çiçək açıb,

Bağçamızdakı alça.

Turqut gülür:

Yaz qışı

Dırmaşdırıb ağaca!..