Vallah, qınamıram sizi yenə də,

Ay mənim başıma oyun açanlar.

Bilirəm boş yerə səhv eləməzsiz,

Yəqin, fırıldağa çox ehtiyac var.

Sizə nə lazımdı? Eləyirəm də,

Gedib orda-burda “lox”du deməyin.

Mən bilim, siz bilin, bir Allah bilsin,

“Bədbəxtin qafası yoxdu”- deməyin.

Onsuz da “krupnu” imkanım yoxdu,

Vallah, olanımdı, qopardığınız.

Sizə qurban olum, ağ eləməyin,

Qoy halal-xoş olsun apardığınız.

Noolar, siz deməyin, özüm deyirəm:

-Dünyanın ən “tupoy” fağırı mənəm.

Onsuz da körpüdən keçən kor döyəm,

Yenə aldanacam halıma binəm.

Reklam eləyəndə hünərinizi

Məndən hər yetənə söz anlatmayın.

Elə yandırın ki, tüstüləndirib,

Arvada-uşağa çox danlatmayın.

Çoxdu danlayanım müdrikcəsinə,

Çəkmirəm gerçəyə qol, danıram mən.

Canım “atanşik”lər, bunuca bilin:

Hər dəfə könüllü aldanıram mən.

11.04.26