Sona Çərkəz, şair -publisist : - TƏBİƏTLƏ DANIŞMAĞI BACARAN ALİM

v
İnsan həyatı öz mənasını təkcə var olmaqda yox, həm də qurub yaratmaqda, əməkdə, mübarizdə tapır. Bu mənada, özünü elmə həsr edənlər həmdə ikiqat bir ömür daşıyıcısı olurlar. Çünki şəxsi həyat bəzən ictimaiyyətin diqqətini çəkmir, amma elmə sərf olunan həyat həm verdiyi bəhrə ilə, həm də davamçıları ilə xüsusi önəm kəsb edir. Bax, bu mənada indi barəsində danışmaq istədiyim bir alim ömrünü, daha doğrusu onun elmə həsr etdiyi həyatı sizə tanıtmaq istəyirəm.
Bəhram Hüseyn oğlu Əliyev 1955-ci ilin sentyabr ayının 2-də Zəngibasar rayonunda anadan olub. Onun doğulduğu torpaq düşmən caynağında olsa da, Vətənin bir parçası kimi bu gün də and yerimizdi və Azərbaycan Prezidenti cənab İlham Əliyevin dediyi kimi, biz o torpaqlara da qayıdacayıq! Məhz Bəhram Əliyev kimi oğulları olan həmin torpaq öz sahibinə qovuşacaq.
1973-cü ildə əmək fəaliyyətinə “VODQEO”-nun Bakı filialında laborant vəzifəsinin icrası ilə başlaması sabahın alimi üçün gələcəyə gedən işıqlı yolun başlanğıcı oldu. Çox keçmədiki Bəhram müəllim Azərbaycan İnşaat Mühəndisləri İnstitutunun hidromeliorasiya fakültəsinin “mühəndis – hidrotexnik” ixtisasına yiyələndi. Elə bu seçimlə də onun alim həyatının uğurları elm dünyasına səs salmağa başladı.
İllər bir-birini əvəz etdikcə, artıq təkcə Azərbaycanda deyil, onun hüdudlarından kənarda da gənc mütəxəssis kimi tanınmaqla diqqəti özünə çəkdi. 1988-ci ildə o, Novoçerkaski şəhərində namizədik dissertasiyasını müvəfəqiyyətlə müdafiə edib “Melorasiya və suvarma əkinçiliyi" ixtisası üzrə texnika elmləri namizədi elmi dərəcəsini aldı. Bu yeni uğur da öz növbəsində artıq onun həyata tətbiq edilən ixtiralarına təkan verdi. Belə ki, təkcə MDB ölkələri deyil İran, Türkiyə, Kuba, Almaniya, İsrail kimi digər ölkələrdə də onun ixtiraları geniş şəkildə öyrənilməyə və tətbiq olunmağa başlanıldı.
Uğur-uğur gətirər deyiblər. Həm də israrlı və məqsədli, eləcədə əməksevər olanda uğur daha tez gəlir. Bu mənada artıq 1995-ci ildə Bəhram Əliyev Rusiyada doktorluq dissertasiyasını müddafiə edərək “hidrotexniki melorasiya” ixtisası üzrə alimlik dərəcəsi almışdı. Burada bir məqamı da xatırlatmaq yerinə düşər - belə ki, bu gün Rusiya Elmlər Akademiyasının həqiqi üzvü, görkəmli melarator alim, texnika elmlər doktoru, professor Bəhram Əliyev öz elmi uğurunun yəni alimlik dərəcəsini Azərbaycan Elmlər Akademiyasında müdafiə edərək burada da alimlik dərəcəsini təsdiqlətmişdi.
Yorulmaq bilmədən çalışan, çoxlu sayıda elmi əsərlərin, kitabların, monoqrafiyaların müəllifi olan Bəhram Əliyev bir çox beynəlxalq akademiyaların da həqiqi və müxbir üzvü seçilmişdir. Onların arasında Beynəlxalq Ekologiya və Təbiətdən İstifadə Akademiyası, Beynəlxalq Mühəndislər Akademiyası, Rusiya Su Təsərrüfatı Akademiyası, Rusiya Kənd Təsərrüfatı Akademiyası və digərlərinin ünvanlarını öz imzasında təsdiqlədən Azərbaycan alimi ölkəmizdə də yaxşı tanınır. O çalışdığı bu illər ərzində çoxlu sayda mükafatların, diplomların, titulların sahibi olmuşdu. Müəyyən dövrlərdə Respublikanın Kənd Təsərrüfatı Nazirinin müavini, bu gün isə Respublika Müdafiə Sənayesi Nazirliyi, Milli Aerokosmik Agentliyi (MAKA) Ekologiya İnstitutunun Direktoru vəzifəsində çalışır. Bu gün iki övlad atası olan Bəhram müəllim paralel olaraq öz biliyini, təcrübəsini Azərbaycan İnşaat Mühəndisləri Universitetinin “hidrotexnika və melorasiya” kafedrasının professoru kimi tələbə və magistirlərə öyrədir.
Böyük həyat təcrübəsi olan, torpağın, suyun dilini hamıdan yaxşı bilən, təbiətlə təmas qurub onun ağrıyan yerini müalicə edən professor Bəhram Əliyev bu günlərdə Türk Dünyası Akademiyasının akademiki seçilib. Xoş bir təsadüfdür ki, elmə özünü həsr edən alim məhz doğum günü ərəfəsində bu adı qazanıb. Görünür burada bir İlahi diqqət də var. Çünki Azərbaycan torpaqlarını eroziyadan qorumaq, su qıtlığının qarşısını almaq üçün bir övlad olaraq gecə-gündüzünü sərf edən, yeni biliklər əxs edən alim öz mükafatını da, halal haqqını da, torpağını sevən adamlardan, dəyər verənlərdən alıbdır.Şəxsən mən tanıdığım andan çox doğma bildiyim Bəhram müəllimi bu mükafata ən layiqlilərdən biri hesab edirəm. Mənə görə o, Allahın seçdiyi dəyərlilərimizdən biridi! Və inanıram ki, bu fəxri ad da ona verilən növbəti bir dəyərdi, qiymətdi- Mübarək olsun!

