Yenə qollarımı çırmalamışam,

Köhnə həyatımı suya çəkirəm.

Yığıb toplayıram dağılmışları,

Batan bir nəfəsi göyə çəkirəm.

Sökülən yerləri yamaqlayıram,

Güllü yaralara tumar çəkirəm.

Saralıb-solanı sığallayıram,

Sevgimi üzünə hamar çəkirəm.

Çat-çat olanları bitişdirirəm,

Gedib-gələnlərə keşik çəkirəm.

Əllərim gücünü itirsə belə,

Səninçün ürəklə beşik çəkirəm.

Çəkirəm hər şeyi, fərasətə bax,

Başımın üstündən yeri çəkirəm.

Elə dayanmışam - vaxtı, saatı,

Zamanı özümdən geri çəkirəm.

25 avqust, 2016.