1.

ARAMIZDA DİVAR

hər kəs özüylə elə bil

bir divar gəzdirir,

görüşdükmü

anında

aramıza qoyuruq o divarı;

hə, bir söz, iki söz

bir də baxırıq ki,

aramızda divar

var.

bəzən də

açıq, divarsız bir sərhəd olur o divar

ƏL də edə bilmirik

bir-birimizə...

2.

OD SAQASI

bizi də bir yerimizdən,

baxın bir,

sanki od canlandırır, cana gətirir;

o od

ayağımızdamı, əlimizdəmi,

ya bağrımızın başında,

bəlkə gözdə, göz yaşında?

hə, vallah, mən bütün insanların,

insanlığın da

odla hərəkətə gəldiyinə tam

inanıram;

kiməsə şeir yazdırır,

kiməsə bir nəğmə bəstələdir,

kiməsə yat deyir,

kimisə yuxudan oyadır o od,

beləcə sürdürür həyatı o od...