qoy bir qulaq asım hələ, görüm ayağın

nə deyir yola,

nə deyir əllərin bir işin qulpundan

yapışan zaman...

həmişə marağındayam susub üzümə

baxanda

bir-birini sıxan barmaqlarının səsini eşidib

sözünü dinləyim...

kürəyin

söykəndiyin divara nələr söyləyir?

hansı uzaqlıqdan gəlir yollar yorğunutək

çırpınan təngnəfəs ürək;

bu vaxt harasa

baş götürüb qaçır elə bil köksündən,

ən dərin dəryalarda yelkən açır elə bil...

bir anlasaydım gözlərin gözlərimə

dikiləndə nə demək istəyirlər

və bir söz deyəndə

nə demək istəyirəm

özüm bir bilsəydim, bilsəydim əgər...