Bu yay da belə keçdi...

Durnalar da döndülər,

Qaranquş yuvaları

Qəribsədi bu səhər.

Əsdi vədə yelləri,

Balalar,gəlin bəri,

Çiçəkdən kəpənəyi,

Çəmənlərdən çiçəyi,

Gülü ayıran kimi

Sizi ayırıram mən

Bu çöldən,bu çəmədən.

Yanları qızılağaclı

Arxlar burda qalacaq

Bizimlə getməyəcək

Dağlar,burda qalacaq.

Əritmişik o ayı,

Əritmişik bu günü,

Gedək,biz də artıraq

Şəhərin tünlüyünü,

Bu yay da belə keçdi...

Bu yay da belə keçdi,

Qaranquş kimi uçdu,

Balıq kimi sürüşdü,

Bir ay incəldi düşdü,

Düşdü il ağacından,

Heç baş aça bilmədik

Bu ay qaçhaqaçından,

Bu il qaçhaqaçından,

Bu yay da belə keçdi.

Eh,nə fərqi tələsək,

Ya da heç tələsməyək,

Kol dibində bənövşə,

Zəmi içində lalə

Heç yaya da qalmadı,

Uçub getdi xəyaltək.

Bu yay da belə keçdi,

Bu yay da xəyallaşar...

Vələsləri saralar,

Gilasları allaşar...

Barı məqam var hələ,

Doğmaca yurda,elə,

İlk nəğməyə ilk sözə,

İlk ocağa,ilk közə

Qayıda bilirik biz.

Doğmalıq hissimizi

Ayılda bilirik biz.

Çoxunun qismətini

Görmüşəm bu həyatda

Qamışların ayağı

Yuyuldu gecə-gündüz,

O quruyan qarağac

Odlandı günəş altda.

Bu yay da belə keçdi...

Qaldı bulaq başında

Çatdaq ocaq daşları.

Tək-tək yarpaqlar düşüb

Örtdü o xatirəni,

Örtdü o yaddaşları...

Bir az bahara yaxın,

Bir az qışdan uzağam.

Payızdan söz salmayaq,

Yarpaqlarım tökülər-

Yaman kövrək budağam...

Bu yay da belə keçdi...

Udmaq istərkən çayı

Mənzil kəsən tərli at,

Sahibinin qamçısı

İşə düşər o saat.

Dodaq sallayıb çaya

Ciyəri yana-yana

At da keçər o taya.

Mən də belə keçirəm

Bu çayların üstündən,

Bu ayların üstündən.

Qayıdıb dala baxdım,

Bir az könlüm darıxdı.

Bu yay da belə keçdi,

Bu çay da belə keçdi...