Neynirəm o gözü,o güzgünü mən,

Üzümə baxmağa üzüm yoxdusa.

İçimdən çölümə hey avar çəkən,

Duyğumun dizində dözüm yoxdusa.

Hər gün eşq öpmürsə dodaqlarımı,

Son zəng səsi döyər qulaqlarımı.

Kəsin yerli- dibli ayaqlarımı,

Səcdəyçün bükülən dizim yoxdusa.

Yalnız haqq önündə əyilər başım,

Axsa eşqdən axar bulaq göz yaşım.

Mən nəyə lazımam atam- qardaşım,

Məndən sonra mənli izim yoxdusa.

Elnuram, o qara daşa eşq döyən,

Uğurum da budur,ey mən- mən deyən.

O gün bircə anda yaşamıram mən,

Həyatın alnında sözüm yoxdusa.