Əbülfət Mədətoğlu - Telefon xətti
Ədəbiyyat
08:25 / 10.09.2025
Baxış sayı: 5944
Bu gecə asılmışam
telefonun bir ucundan...
mən cəzamı çəkirəm -
ömrün hansı suçundan?!.
Səsim ünvana çatmır
sözüm ilişir xəttə...
Bu ara nida gəzir-
gözüm hansısa bənddə...
Yaşadığım həyacan
tündləşdirir gecəni...
Allah yerdən Ayacan -
duyur, candan keçəni!
Ulduzların bürküsü
təlaşıma şeh səpir...
Səsi qırılan ürək -
sübhə təzə xətt çəkir...
