Ayaz Arabaçı : - Qəpik-quruş kimidi təsəllilər...
Qəpik-quruş kimidi təsəllilər
heç nəyə yaramır.
Ən isti sözlər belə
ürəyimin dağınıq tellərini daramır.
Gözlərimdə yağış dilində
buludlar çərənləyir.
Barmaqlarım ac quş kimi
papiros qutularını dənləyir..
Kor taleyin
nəyinə lazım,
neçə rəng var göy üzündə
unudalım hər şeyi,
xatırlamağa nə gərək var.
Mənim
alın yazımı işıqsız evlərin,
yolçusuz yolların
əcəl təri apardı.
Bir qadın sevmişdim əri apardı..
Öz-özümə danışıram otaq boyu,
Ağlıma
o qədər qorxunc şeylər gəlir ki..
Çox uzun zaman susdun,
sən də aramadın məni,
Tanrım..
ütüləmədin əzilmiş sinəmi.
Amma mən yenə də,
sənin üzündən öpürəm..
Və bir də ağrılarıma
təbəssümündən öpürəm..