Gecə - ömrümün yarısı,

Yağış - dərdimin parası.

Payız - kədərimi geyən,

Qış - qapımı qəfil döyən.

Ulduz - əlçatmaz arzumdu,

Şeir - oğlumdu, qızımdı.

Sirdaş - qəlbə yuva salan,

Övlad - məndən mənə qalan.

Sevgi - qəfil itirdiyim,

Ömür - başa yetirdiyim.

Arzu - uzaqda qalanmış,

Vüsal - sən demə yalanmış.

Dost - hərdən xəyanət edən,

Gənclik - məni atıb gedən.

Dünya - yaşamaq həvəsi,

Həsrət - ömrün son nəfəsi.

Ölüm - başıma dolanan,

Anam - hər dərdimə yanan.

Cənnət - toxunulmaz nəfəs,

Bədən - ruhumuza qəfəs.

Nəğmə - könül pıçıltısı,

Söz - ürəyin çırpıntısı.

1996.