Şakir Xanhüseyn - İYNƏ GÖZÜNDƏN BAXMAQ

Ədəbiyyat 14:33 / 20.01.2026 Baxış sayı: 1903

 

bəzən elə bil hər şeyə

qalxıb özümdən baxıram;

bu yerə, göyə,

tale ələyən ələyə

iynə gözündən baxıram...

kiminsə şah sarayına

kimsə gendən tutur ayna

böyüdüb çəkir yüz yana,

mənsə ona

baxıram iynə gözündən...

ovcumda ürəyimi,

bir nöqtəni dağ kimi,

olur, genişlikdə görmədiyimi

iynə gözündən görürəm...

dərdin yaşı neçə sənə,

necə söyləyim, eh, sənə;

elə payıma düşənə

iynənin gözündən baxdım...