Gəzirəm Təbrizin küçələrini,

Gəzirəm qolbaqol,

dolanbadolan.

Çəkirəm gözümə gecələrini

Təbriz pıçıldayır,-

xoş gəlib balam...

Çıxıb Aynalıya çiçək dərməyə,

Şeir bağlayıram gül tağlarından.

Yanır duz içində susuz Urmiya

Öpürəm qurumuş dodaqlarından.

Ötüb Araz boyu ayrılıqları,

Həsrətin gözünə ağ çəkirəm mən.

Çırpıb üzümdəki yad qınaqları

Tənəyə, hikkəyə dağ çəkirəm mən.

Mən səcdə qılıram burda hər şeyə,

Öpüb hər daşını təzələnirəm.

Vurub Şah gölündə badə badəyə

Şallaqla, məhmizlə məzələnirəm.

Dolaşıb Səhənddən Səlmasa kimi,

Vətənin dadını çıxarıram mən.

Qubanın Ay üzlü alması kimi

Sevincdən qızarıb ağarıram mən.

Kim atır o daşı o yan, bu yandan,

Hələ də dəmdədir səbr qazanı.

Düşmən ocağına od daşıyandan

Doğmadır qardaşın qəbir qazanı...

Gəzirəm Təbrizin küçələrini,

Gəzirəm qolbaqol,

dalanbadalan.

Çəkirəm gözümə gecələrini

Təbriz pıçıldayır,-

xoş gəlib balam...

Reklam