İSMAYIL MƏRCANLI İMANZADƏ :- VƏTƏN ANA, TORPAQ NAMUS, SEVGİ ƏMANƏT
Dua etdim, ulu Tanrım dadıma yetdi,
Ərən yurdum nər biləkli oğul böyütdü.
Bizə Qorqud babamızdan qalan öyüddü -
Vətən ana, torpaq namus, sevgi əmanət!
Qarı düşmən, aç gözünü tariximə bax,
Daş kitabəm Təbriz, Şəki, Gəncə, Qarabağ...
Naxçıvandan söhbət açdım, söylədi Şahdağ -
Vətən ana, torpaq namus, sevgi əmanət!
Kitab kimi varaqladım Kürlə Arazı,
Əcdadımın Qobustandan gəldi avazı.
Şəhidlərim torpaq üstə qanıyla yazıb -
Vətən ana, torpaq namus, sevgi əmanət!
Salam, igid əsgər balam, sabahın xeyir,
Səhər mehi təbəssümlə qapını döyür.
Göyçə səndən nicat umur, Zəngəzur deyir -
Vətən ana, torpaq namus, sevgi əmanət!
Mən üç rəngli bayrağımla keçmişəm oddan,
Vətən sözü müqəddəsdir hər cürə addan.
Ata millət, ana millət çıxarma yaddan -
Vətən ana, torpaq namus, sevgi əmanət!