Bircə içim su olub,

Axıram gözlərimdən.

Bəxtimi itələyib,

Yıxıram gözlərimdən.

Bilirsən, üzülürəm,

Aynalara baxanda.

Yarpaq kimi tökülən

Qaşlarımı sıxanda.

Seyrələn saçlarımın

Vidası ağır gəlir.

Ağrılar güllə kimi

Üstümə yağır, gəlir...

Hər gün təzə yol çəkən

Gözlərimdən yoruldum.

Taleyim kimi sınıq

Güzgülərə vuruldum.

Kim verər ki, canından

Bircə nəfəs pay mənə.

Heç kim mənimtək olub,

Özün tutmaz tay mənə.

Günbəgün maraqlanan

Azalacaq mənimlə.

Balalayan dərdlərim

Çoxalacaq mənimlə...

Bax, onda görəcəyəm,

Dünya neçə bucaqdır.

Kimlər ruhən yaxındır,

Kimlər cismən uzaqdır...

Sağalmayan dərdimin

Neçə-neçə başı var.

Amma, öləndən sonra,

Bircə qara daşı var.

Mənə nə var, köçməyə

Karvanım hazır durub.

Taleyimin bağrını

Qismətim çoxdan yarıb...