Əlizadə Nuri : - Mənə bir ümid verin...

Ədəbiyyat 20:05 / 17.02.2025 Baxış sayı: 991

 

Bir sükuta uduzur,

Milyon adamın səsi.

Hara çıxıb getdi ki

O qaraçı nəğməsi?

İndi necə gizləyim,

Mən bu boyda hüzünü?

Quşlar qanadlarıyla

Saxlayıb göy üzünü...

Haqqın səsi batıbmış-

Yoxsa təkcə kar mənəm?

Mən həm günah imişəm,

Həm də günahkar mənəm.

Sudu çağıran bizi?-

Səs gəlir o quyudan.

Daş da intihar edir

Atılaraq qayadan...

...Yaxşı, kəsdin başımı-

Baş əymədim şahlara.

Mənə bir ümid verin

Paylayım uşaqlara...

...Yaxşı, körpədi balam,

Sözü toxuya bilmir-

" Qara kağızı"m gəlib

Qızım oxuya bilmir...