Əbülfət Mədətoğlu - Sevmək, sevilmək üçün

Ədəbiyyat 11:55 / 16.11.2025 Baxış sayı: 2191

 

Bir qapı, bir nəfəslik

Döyülmür, səs eləmir...

Bir ürək bir həvəslik

Ömrə də bəs eləmir -

Sevmək, sevilmək üçün...

 

"Ah" divara yapışır,

Balınca da göz yaşı...

Mənə görə bəs edər

Hər divara öz daşı -

Sevmək, sevilmək üçün!

 

Göz yolu tumarlayır,

Əl və dodaq şəkili...

Allah HİSS şumallayıb,

Edib qəlbin vəkili -

Sevmək, sevilmək üçün!..

 

....Sevgi deyil həvəslik,

O VARDI!- Var, deyənə ...

Bir qapı, bir nəfəslik

Bəs edər YAR!- deyənə

Sevmək, sevilmək üçün!