Əbülfət Mədətoğlu : - Qədərimin mənzərəsi

 

Ədəbiyyat 12:46 / 16.06.2024 Baxış sayı: 2144

 

Bükür dizlərimi, əyir qəddimi

Bir az can ağrısı, bir az da qədər!..

Sınmazdım, aşmazdım bəlkə səddimi -

Sən sevə bilsəydin elə mən qədər!..

 

Gözdən keçirirəm həyat yazımı -

Hər gün təzələnən boyat yazımı!..

Dondurub qışımı, oyat yazımı -

Qoyma gülümsəsin, bu acgöz kədər!..

 

İçim xırman yeri, xırmançı xiffət

Qəlbim qəlbin ilə bağlayıb ülfət...

Səni sevən gündən bilir Əbülfət -

Hədər yaşamayır, bu ömrü, hədər!..