Tələsmə gələndə ağır-ağır gəl,

Nalədə, fəryadda gözləyəcəyəm.

Bu eşqi hələ ki, cəbrə çevirib,

Qalmısan "bir yadda",

gözləyəcəyəm.

Sözləri muncuqtək ipə-sapa düz,

Bu uzun həsrətin ürəyini üz,

Çox şirin olmuşdu ilk görüşümüz,

O tamda, o dadda gözləyəcəyəm.

Gözümdə sayrışan qövsi-qüzeh gəl,

Qızılgül üstündə bir ovuc şeh gəl,

Günəş gəl, yağış gəl, duman gəl,meh gəl,

Mən səni hər adda gözləyəcəyəm.

İstidi, düş bir az sərinə nədi,

Getmə o qədər də dərinə, nədi,

Ay nədi, il nədi, qərinə nədi,

Səni hər saatda gözləyəcəyəm.

Şəklini taparsan könlümü yarsan,

Yaxşı ki, bu qədər naləmə karsan..

Öləndə tapacam o dünya varsa,

Sağ ikən,

həyatda gözləyəcəyəm.