Əynimdə köynəyim yaşdı,

içimdə göynəyim yaşdı !

Bu necə yaşamağdır ?!

adın yaxın,sən uzaqsan !

Damarımı tel et saza,

qışda qalım,çıx get yaza !

Ömür düşüb çoxdan aza,

azdan çoxa yalquzaqsan !

Çöldə tikdim daşdan evi,

sökdüm yüz cür başdan evi !

Çıxartdım ki,qışdan evi,

dedim,bəlkə qalacaqsan !

***

Olmaq da-qaçılmazdı,

Haqq görən qocalmazdı !

Yoldan bir gedən azdı,

Halıma satdı məni !

Çağır,Tanrını çağır

Göy əzəl,yerə yağır !

Süfrəsi bol,bu ağıl

Bilimə satdı məni !,

“Lələ köçüb,yurd qalıb”

Ulamağa qurd qalıb !

O,da məndən söz alıb,

Dilimə satdı məni !

Qan rəngində gülüm var,

Öz gözümdə gölüm var !

Mənim ki,bu dilim var

Külümə satdı məni !

Nə biləymiş beləymiş,

Dünya yağış,küləymiş !

Anam hələ doğmamış,

Zülümə satdı məni !

Şəkil-şəkil adamlar,

Yarpaq-yarpaq soldular !

Yaşamaqçün qalanlar,

Ölümə satdı məni !

***

Görüb səni tanımasın…

Qoy, üzünə tanınmasın!

Tanıyar sən tanımasan,

Bu,dərd də adam tanıyır !

Üz çevirib,göz yumsanda

Xəbər tutur hamısından !

İlanı öz yuvasında,

Günahı-edam tanıyır !

Gəlibdisə,çat qaşları

Şeytan-sənə at daşları !

Göylərdə uçan quşları,

Yerdə də adam tanıyır !

Dağ başı-Qartal o,quşun

Viranələr də,bayquşun !

Yazın,yayın,payız,qışın

Evlərin dam-dam tanıyır !

Söz vermə,ağır çəkisi

Ölçən var ağıl çəkisin !

Səni sınağa çəkməsin,

Dildən də adam tanıyır !

          ***