Azərbaycan xalqının elə günləri var ki, onlar zaman keçdikcə öz əhəmiyyətini itirmir, əksinə, milli yaddaşımızda daha da möhkəmlənir. 8 Noyabr – Zəfər Günü də xalqımızın tarixində belə şərəfli günlərdən biridir. Bu tarix milli birliyimizin, dövlətimizin gücünün, ordumuzun qəhrəmanlığının və xalqımızın Vətən sevgisinin təcəssümüdür.

2020-ci il noyabrın 8-də Şuşanın işğaldan azad edilməsi Azərbaycan tarixində yeni bir səhifə açdı. Bu qələbə uzun illər torpaq həsrəti ilə yaşayan xalqımıza böyük sevinc və qürur bəxş etdi. Şuşanın azadlığı yalnız hərbi uğur deyil, həm də milli-mədəni irsimizin, tariximizin və mənəvi dəyərlərimizin təntənəsi idi.

Vətən müharibəsində Azərbaycan Ordusunun göstərdiyi qəhrəmanlıq, əsgər və zabitlərimizin fədakarlığı, xalqımızın birliyi Zəfər tariximizin əsasını təşkil edir. Bu qələbənin arxasında şəhidlərimizin müqəddəs qanı, qazilərimizin mübarizəsi və dövlətimizin qüdrəti dayanır.

Zəfər Gününün məktəblərdə qeyd olunması sadəcə əlamətdar tarixin xatırlanması deyil, gələcək nəslin vətənpərvərlik ruhunda tərbiyəsi baxımından mühüm əhəmiyyət daşıyır. Məktəb yalnız bilik verən deyil, həm də milli-mənəvi dəyərləri aşılayan, vətəndaşlıq mövqeyini formalaşdıran tərbiyə ocağıdır.

Bu baxımdan məktəblərdə 8 Noyabr münasibətilə tədbirlər yüksək səviyyədə təşkil edilməlidir. Şagirdlərə Vətən müharibəsinin tarixi, 44 günlük müharibənin gedişi, işğaldan azad edilmiş torpaqlarımız və Şuşa əməliyyatının əhəmiyyəti haqqında dolğun məlumat verilməlidir.

Ədəbi-bədii kompozisiyalar, şeir və inşa müsabiqələri, rəsm sərgiləri, bilik yarışları, sənədli film nümayişləri və tarix dərsləri bu tədbirlərin əsas istiqamətlərindən olmalıdır. Şagirdlər Vətən, Qarabağ, Şuşa və qəhrəmanlıq mövzularında öz düşüncələrini ifadə etməli, tarixi faktları araşdıraraq təqdimatlar hazırlamalıdırlar.

Belə tədbirlərin əsas məqsədi uşaqlara vətənpərvərliyin mahiyyətini aşılamaqdır. Vətənpərvərlik yalnız qəhrəmanlıq haqqında danışmaq deyil. Yaxşı oxumaq, bilik qazanmaq, dövlətinə və xalqına faydalı olmaq, milli sərvətlərimizi qorumaq da Vətənə xidmətin mühüm formalarıdır.

Zəfər tariximizdən danışarkən şəhidlərimizin müqəddəs xatirəsini xüsusi ehtiramla yad etmək hər birimizin mənəvi borcudur. Onlar Vətənimizin azadlığı və torpaqlarımızın bütövlüyü uğrunda canlarından keçərək adlarını tariximizə əbədi yazdırıblar.

Məktəblərdə şəhidlərin həyat və döyüş yolunun öyrənilməsi, xatirə guşələrinin yaradılması, şəhid ailələri və qazilərlə görüşlərin təşkili böyük tərbiyəvi əhəmiyyət daşıyır. Şagirdlər qəhrəmanlarımızın həyat nümunəsində Vətən sevgisinin, sədaqətin və fədakarlığın nə demək olduğunu öyrənməlidirlər.

Şəhidlərə ehtiram yalnız əlamətdar günlərdə deyil, gündəlik həyatımızda da özünü göstərməlidir. Onların ailələrinə diqqət, qazilərimizə hörmət və Vətənə layiqli xidmət bu ehtiramın ən gözəl ifadəsidir.

Zəfər tarixinin gənc nəslə çatdırılmasında müəllimlərin rolu əvəzsizdir. Müəllimlər tarixi faktları şagirdlərə düzgün çatdırmalı, onların müstəqil düşünməsinə və araşdırma aparmasına şərait yaratmalıdırlar. Tarix, ədəbiyyat, musiqi və digər fənlərin imkanlarından istifadə etməklə Zəfər mövzusu tədris prosesinin mühüm hissəsinə çevrilməlidir.

Vətənpərvərlik tərbiyəsi yalnız məktəbin vəzifəsi deyil. Bu proses ailədə başlayır, məktəbdə davam edir və cəmiyyətin dəstəyi ilə möhkəmlənir. Valideynlər övladlarına Vətən sevgisini, milli tarixə və dövlət rəmzlərinə hörməti öz davranışları ilə aşılamalıdırlar.

Məktəblərdə ziyalıların, yazıçıların, şairlərin, tarixçilərin və müharibə iştirakçılarının iştirakı ilə görüşlərin keçirilməsi də şagirdlərin dünyagörüşünün zənginləşməsinə xidmət edir. Həmçinin Zəfər Muzeyinə, Hərbi Qənimətlər Parkına və tarixi məkanlara ekskursiyaların təşkili uşaqların tariximizi daha dərindən öyrənməsinə imkan yaradır.

Zəfər tarixini yaşatmaq gələcəyimizi qorumaqdır

8 Noyabr – Zəfər Günü Azərbaycan xalqının milli qürurunun, birliyinin və sarsılmaz iradəsinin rəmzidir. Bu tarixi gün bizə Vətənə bağlılığın, dövlətçiliyə sədaqətin və xalq həmrəyliyinin nə qədər böyük güc olduğunu bir daha göstərdi.

Məktəblərdə Zəfər Gününə həsr olunan tədbirlər tarixi yaddaşımızın qorunması və gələcək nəsillərə ötürülməsi baxımından mühüm əhəmiyyət daşıyır. Bu gün məktəb partası arxasında əyləşən uşaqlar sabah ölkəmizin gələcəyini quracaq vətəndaşlardır. Onlar tariximizi bilməli, şəhidlərimizin qəhrəmanlığını unutmamalı, qazilərimizə hörmət etməli və Vətənə layiqli xidmət göstərməlidirlər.

Unutmayaq ki, Zəfərin davamı savadlı, vətənpərvər, mənəviyyatlı və məsuliyyətli nəslin yetişməsidir. Məktəblərdə keçirilən hər bir tədbir uşaqların qəlbində Vətən sevgisini gücləndirməli, onları gələcəyə inamla baxmağa ruhlandırmalıdır.

Zəfər tariximiz unudulmamalı, şəhidlərimizin əziz xatirəsi daim yaşadılmalı, Qarabağın zəngin mədəni irsi gələcək nəsillərə ötürülməlidir.

Zəfər Günün mübarək, Azərbaycan! Şəhidlərimizin ruhu qarşısında baş əyir, qazilərimizə möhkəm cansağlığı arzulayırıq. Qoy üçrəngli bayrağımız daim yüksəklərdə dalğalansın, Zəfər tariximiz gələcək nəsillərin qürur mənbəyi olsun!

 Sevil Azadqızı