Bir kərə də üzümə kəc baxmayıb,

Qoynunda çox xatirəmi saxlayıb,

Ayrılanda ürəyim qan ağlayıb

Çox bağlıyam bu torpağa, bu yurda!

Kimliyimi burda yaxşı bilirəm,

Uşaq kimi ağlayıram, gülürəm.

Göz yaşımı gülə-gülə silirəm,

Çox bağlıyam bu torpağa, bu yurda!

Hər ürəyin bir cür dərdi-səri var,

Ümidi var, inancı var, piri var,

Bir anamı itirsəm də, biri var,

Çox bağlıyam bu torpağa, bu yurda.

Suyu məlhəm, yeri cənnət, göyü nur,

Köksüm altda ürək kimi döyünür,

Haqqı var ki, Zəka onla öyünür,

Çox bağlıyam bu torpağa, bu yurda!

12.06.2024