Əbülfət Mədətoğlu : - GƏLİM
Yastığını qucaqlama gecələr
Qoy qolların yol gözləsin - mən gəlim.
Deyirsən ki, işıq düşər görərlər -
Yaxşı, onda, dönüb olum çən gəlim!
Səhər mehi, çəmən şehi, quş səsi
Qoy sındırsın
ürək sıxan qəfəsi.
Qatmaq üçün
nəfəsinə nəfəsi -
Sünbül kimi,
vağanayıb dən gəlim!
Xoş qismətdi anlamaq da,
anmaq da,
Sonuncuyam sevdiyimi danmaqda.
Sənin üçün diri gözlü yanmaqda -
Çətin ki, mən Əbülfətə tən gəlim!..