Fərhad Ələkbərov :- 25 yaşın mübarək, şəhidim FƏRİD!
Dayanmışıq üz-üzə...Soyuq məzardaşından baxan şəkili ilə söhbət etməyə çalışıram... Daşlaşıb tarixləşmiş bu şəkilin sahibiçox qısa bir ömür yaşasa da, amma əbədi yaşamağı haqqını ucaldığı şəhidlik zirvəsi ilə qazanmışdı... Şəhidlər xiyabanında uyuyan ŞAMİLOV FƏRİD MİRZƏ oğlu 4 may 1999-cu ildə Sumqayıt şəhərində zəhmətkeş bir ailədə doğulmuşdu. Elə orta təhsilini də bu şəhərdəki 16 saylı tam orta məktəbdə başa vurmuşdu.
Onu yaxşı tanıyanların dediklərindən məlum olur ki, Fərid hələ uşaq yaşlarından öz yoldaşlarından qoçaqlığı və mehribanlığı ilə çox seçilirmiş.. İgidimiz onu tanıyanların xatirəsində gülərüz və səmimiyyəti ilə yanaşı həmçinin də vətənpərvərliyi ilə də qalmışdır. Onun qoçaqlığı və vətən sevgisi haqqında hamı çox böyük həvəslə danışır və vurğulayırlar ki, bu xüsusiyyətlər onu hamıdan, ən çox da yaşıdlarından fərqləndirirdi. Eləcə də böyükdən-kiçiyə hər kəsə köməkliyini əsirgəməyən Fərid çox qayğıkeş və mehriban biri olaraq da yaddaşlarda qalıb. Uşaqlıqdan vətəninə, torpağına bağlı olan Fərid onu tanıyanların sevimlisi və hər bir işdə fəal, dürüst, qoçaq bir oğlan idi.Ailənin böyük övladı olan Fərid özündən kiçik bacı və qardaşına nümunə, həmyaşıdlarına örnək olmağı bacarmışdı.
2005–2016-cı illərdə Sumqayıt şəhər 16 saylı tam orta məktəbdə təhsil alan Fərid bütün müəllimlərin və sinif yoldaşlarının sevimlisi olmaqla dərslərinə hazırlığı, nizam-intizamı, tərbiyəsi, nümunəvi davranışı və özünəməxsus xarakteri ilə də məktəbdə yaşıdlarından seçilirdi.
Həyat elə gətirdi ki, 2013-cü ildən döyüşə getdiyi tarixə qədər Fərid atası Mirzə və nənəsi Tamara xanımın himayəsində yaşadı, böyüdü . Ona görə də daha çox ünsüyyətdə olduğu nənəsi Tamara xanıma tez-tez deyirdi ki, "Nənə, gedib Şuşanı ermənlərin əlindən alacam, sənidə aparacam azad Şuşamıza!…"
Orta təhsilini başa vuran Fərid Şamilov 2017-ci ilin iyul ayında Səfərbərlik və Hərbi Xidmətə Çağırış üzrə Dövlət Xidmətinin Sumqayıt şəhər İdarəsindən həqiqi hərbi xidmətə yolla salınıb. Füzuli rayonunun Haramı düzündəki N saylı hərbi hissədə ön xətdə xidmət edib. 2019-cu ildə yanvarın 9-da hərbi xidmətini başa vurub doğulduğu şəhərə qayıdıb. Özəl şirkətlərin birində mühafizəçi olaraq əmək fəaliyyətinə başlayır. Səfərbərlik elan olunanda o işini və gələcək həyatını ikinci planda saxlayaraq döyüşlərdə iştirak etməyi özünə borc bilir. 2020-ci ildə Tovuz döyüşlərindən sonra könüllü olaraq Səfərbərlik və Hərbi Xidmətə Çağırış idarəsinə ərizə ilə müraciət edirək orduya getmək istədiyini bildirib. Onun bu istəyi müsbət qarşılanıb . 21 sentyabrın 2020-ci il tarixində o yenidən xidmətə çağrılıb. Həyat elə gətirdi ki, Qusar rayonunda bir müddət təlimlər keçən Fərid əsgər yoldaşları ilə birgə sentyabrın 27-də döyüşə yollanır.
Hələ ilk əsgəri xidməti zamanından tanıdığı Füzuli istiqamətində gedən döyüşlərə qatılan Fərid məharətlə vuruşurdu. Zəngilan, Xocavənd, Cəbrayıl, Şuşa və Laçın rayonları uğrunda gedən döyüşlərdə Fərid vətənə layiqli övlad olduğunu xidməti ilə sübut edir. Fəridin atasına axırıncı telefon zəngi son döyüşündən bir gün əvvəl - noyabrın ayının 7-sində oldu.
Telefonla danışanda; "ata, sən ala bilmədin, amma mən aldım o torpaqları. Şuşa bizimdir, sən narahat olma”, - dedə Fərid.
Burada xatırlatmaq lazımdır ki, Fəridin atası I Qarabağ savaşının iştirakçısı olan Mirzə Şamilovda oğlunun bu sözlərindən sonra kövrək səslə onunla ila qürur duyduğunu, onunla fəxr etdiyini bildirir. Gözləri dolan ata, bircə kəlmə dedi :
- Sağ ol, oğlum!
2020-ci il noyabrın 8-dən 9-na keçən gecə Xocavənd rayonunun Qırmızı Bazar kəndində ağır döyüşlər gedir. Çətin şəraitdə yaralı silahdaşlarına köməkliyini əsirgəməyən igidimiz minamyot atəşindən ağır yaralanaraq qəhrəmancasına şəhid oldu. 44 günlük Vətən Müharibəsi qəhramanları sırasında olan Fərid tarix yazaraq şəhadətə qovuşdu. Onunla Vida mərasiminə toplaşan Müdafiə Nazirliyinin əməkdaşları, şəhər icra hakimiyyətinin nümayəndələri və yüzlərlə şəhər sakinlərinin iştirakı ilə Fərid Şamilov Sumqayıt şəhər Şəhidlər Xiyabanında dəfn olundu.
1993-1997-ci illərdə I Qarabağ müharibəsinin döyüşçüsü , bu gün isə şəhid atası olan Mirzə Şamilova oğlunun cənazəsinə bükülmüş üçrəngli Azərbaycan bayrağı təqdim olundu. Həmin bayrağı sinəsinə sıxan ata özünü toparlayıb - Vətən sağ olsun!- dedi.
Bu Zəfər gerçəkliyi
Ərzi heyrətə saldı...
Bizi özünə çəkən -
Torpaq Qələbə çaldı!
Bəli, bu gün canından artıq sevdiyi VƏTƏN uğrunda şəhid olan Fərid Mirzə oğlu Şamilov Azərbaycan Respublikasının Prezidentinin sərəncamı ilə ölümündən sonra “Vətən uğrunda”, “Xocavəndin azad olunmasına görə” medalları ilə təltif edilmişdir.
Bu gün 25 yaşını cənnətdə qeyd edən Şəhidimizin mövlud günüdür. Mehriban və gülərüzlüyü , dürüstlüyü və qoçaqlığı ilə yadda qalan Fərid daim onu sevənlərin qəlbində yaşayacaq.Bu bir həqiqətdir ki, ŞƏHİDLƏR ÖLMÜR!!!