Südabə Sərvin -ÇIXIB DA GETDİN

Ədəbiyyat 13:00 / 28.06.2026 Baxış sayı: 484

 

Bir bahar qəlbimdən salıb yolunu,

Bir payız eləcə çıxıb da getdin.

Nə bilim bu sevgi tale oyunu?!.

Könlümü yandırıb yaxıb da getdin.

 

Sən mənim ömrümə gəldin yarımçıq,

Gəlib qismətimi böldün yarımçıq.

Yazdın bir xatirə, sildin yarımçıq,

Qüssəli-qüssəli baxıb da getdin.

 

Sərvinin qəlbində quzeyə döndün,

Həzin xatirəli muzeyə döndün.

Niskilli, yanıqlı bir neyə döndün,

Ülkər ulduzu tək axıb da getdin.

2005