Sakit okeana məktub

Ola bilməz ki, səndə kiçik bir şey tapılmasın,

Mən baradə.

Ola bilməz ki, sən mənim haqqımda eşitməyəsən,

Milyon il sonra da,

Milyon il əvvəl də .

Necə ki, mən sənin haqqında bilirəm,

Eləcə də sənin məndən xəbərin var...

Ürəyimin sol mədəciyinin gücü ilə

Sənin bir dalğanın çıpıntısı arasında

Düz bir xəttin olduğuna əminəm.

Beynimdə bir milyon hüceyrənin

Tək birində,

Sənin o dalğanı tərpədən gücün

Gizli işarəsi var.

Ona görə

Sənin sularını yellədən külək

Mənim də ürəyimi oynadar.

Necə ki, sən qaralanda mən ağarıram,

Ya da əksinə.

Necə ki sən gülürsən,

Mən ağlayıram,

Ya da əksinə.

Sən də kimnsə köləsisən

Mən də.

Sən də kiminsə kölgəsisən

Mən də.

Hər gecə sağ böyrəyimdə darıxan daş

Pıçıldayır mənə,

Bəlkə də

Sənin sularının dərinliyndə

Milyard ildi oynayan,

Heç vaxt üzə çıxa bilməyən

Sapsarı, yodlu bir daşın

Göz yaşından yaranıb,

Dünyadakı

Qarabəniz,

Ağbəniz,

Göybəniz

Sular!