İlan qum üstündə iz qoyan kimi,

Tellərin sinəmdə iz qoyub getdi.

Köksümə sancdığın ox öldürmədi,

Həsrətin yarama duz qoyub getdi.

De qəsdin nə idi, a zalım qızı,

Şaxtalı qış verib, apardın yazı,

Can alan gözlərin məndən narazı,

Məni qərib eldə tez qoyub getdi.

Qıymazdım bircə an ağrısın başın,

Nə tez düyünləndi alnında qaşın,

Ayrılıb gedəndə o tərs baxışın,

Üzümdə əriməz buz qoyub getdi.

Tükənməz səbrim var Göydən yerəcən,

Enərəm aşağı yüzdən birəcən,

Qayıtsan özümü qurban verəcəm,

Desinlər İdris də söz qoyub getdi.

09.12.24