Elşən Əzim - Axşam   peyzajı

Ədəbiyyat 10:21 / 06.04.2025 Baxış sayı: 761

 

Şər qarışanda

bir yorğun adam gözü

baxır dünyaya.

Göyün üzü

zabit kiteli rəngində

bir cüt ulduz düymələnib yaxasına.

Yarpaqlar

ölüm hökmü almış adam kimi əsir.

Qonşunun pəncərəsindən

mahnı səsi özünü atır

küçəylə gedən maşının

təkərləri altına.

Cırcırama səsi qayçıya dönür

kağız kimi doğranır sükut.

Masamın üstündə pivə köpüklənir

toy tamadasının nitqi kimi.

Dünyanın tavanı çökür elə bil

Yaxşı ki, sərv ağacları var.