Bu gün Sumqayıt Şəhər Poeziya Evində xalq şairi, nasir, dramaturq, publisist, ssenarist, tərcüməçi, bir çox dövlət mükafatları laureatı Nəbi Xəzrinin 100 illik yubileyi münasibətilə möhtəşəm tədbir keçirildi. Tədbiri giriş sözü ilə açan Poeziya Evinin direktoru, tanınmış şair İbrahim İlyaslı ölməz şairin həyat və yaradıcılığı haqqında danışdı. Tədbiri Nəbi Xəzrinin şeiri ilə davam etdirən AYB Sumqayıt Şəhər Bölməsinin sədri, istedadlı şair, əsl ədəbiyyat adamı Gülnarə Cəmaləddin məzmunlu çıxışından sonra estafeti yeni nəslin nümayəndələrinə verdi. Milli Qəhrəman Polad Həşimov adına Sumqayıt şəhər 28 nömrəli tam orta məktəbin istedadlı şagirdləri maraqlı çıxışları ilə tədbiri sona çatdırdılar. Məktəblilərin ifasında şairin şeirləri, sözlərinə yazılmış mahnıları dinlənildi. Elm və qələm adamlarının, təhsil, mədəniyyət işçilərinin iştirakı ilə keçirilən tədbirdə Sumqayıtın görkəmli simaları Ofelya Babayeva, Əşrəf Veysəlli, Rafiq Yusifoğlu, Aftandil Ağbaba, Almaz Ərgünəş Bəyazid, Lilpar Cəmşidqızı və başqaları şairin xatirəsini yad edərək yaradıcılığından danışıb fikirlərini bölüşdülər və Nəbi Xəzrinin Sumqayıt şəhərinin Fəxri vətəndaşı olduğunu qeyd etdilər. Poetik örnəkləri nümunə olan şairin oğlu Arzu Babayev çıxış edərək tədbir təşkilatçılarına və iştirakçılarına dərin minnətdarlığını bildirdi. Arzu Babayev atası haqqında maraqlı məlumatlar söylədi və Sumqayıt şəhərində küçələrdən birinə onun Fəxri vətəndaşı olan Nəbi Xəzrinin adının verilməsinin ən böyük arzusu olduğunu bildirdi. Əminik ki, yaxın zamanlarda bu arzu həyata keçəcək.

10Lilpar Cəmşidqızı və başqa 9 nəfər