Firidun Agazade  -  Şair qızları

Ədəbiyyat 10:58 / 18.02.2026 Baxış sayı: 517

 

Dünən bir şairin qonağı idik,

O - şair, biz şairsayağı idik.

Deyirdim, pəridir çay gətirəni,

Deyirdim, pəridir naz götürəni,

Şair qulluğunda pərilər durar,

Şair pərilərlə durub-oturar...

...Çağırdı, gəldilər bir cüt pəritək,

Gəlib bir yanında durdu hərəsi.

İlham pərisini gəzirdi gözüm,

Demə bu qızlarmış ilham pərisi.

Dedim, sevgilisi şeir olanın

İlham pərisinə çəkir qızları.

Şair duyğusuna bənzədiyindən

Pəriçöhrə olur şair qızları.