ən qəddar, ən izsiz

qatildir vaxt

işini həmişə təmiz görür

əlində qan izi qalmır

eşidilmir qurbanının səsi

bir gün baxırıq ki

hamımızın axırına çıxıb.

₼ ₼ ₼ ₼

ömür axsaq at kimi

tövşüyür,

zamanın qırmancı

altında

biz hələ də düşünürük

gələcək qabaqdadır

halbuki

o artıq çoxdan keçmişdə qalıb

₼ ₼ ₼ ₼

hərəmiz bir hekayə uydurub

aldadırıq özümüzü

uydurma olsa da

çox xoşbəxtik o hekayədə

çünki həqiqət sərf eləmir

sevmək üçün, inanmaq üçün

biz o hekayədə ayrılmırıq

unutmuruq, aldatmırıq gecikmirik

hər şey vaxtında olur

hər gün bir az

daha yaxşı yalanlar uydururuq

hər gün bir az

daha inandırıcı oluruq

və bir gün

artıq ayırd edə bilmirik

hansı bizik,

hansı uydurduğumuz

₼ ₼ ₼ ₼

Sən də bilirsən ki

ayrı fəsillərdə yaşayırıq.

mən çiçək açanda üşüyürəm

sən qar yağanda

yaşamaq üçün

bir az yalan,

bir az xatirə,

bir az da ümid qatırıq ruhumuza